Unnið á kortlagningu mögulegs smits á Reyðarfirði
Grunnskólanum á Reyðarfirði var lokað í dag þar sem upp hafði komið grunur um Covid-19 smit innan hans. Aðgerðastjórn almannavarna vinnur nú að því að kortleggja mögulegt smit. Tveir einstaklingar hafa bæst í einangrun á Austurlandi síðan í gær og eru nú átta talsins þá bættust þrír við í sóttkví og eru nú tólf.
„Til að gæta fyllsta öryggis og varúðar var ákveðið að loka skólanum í dag meðan unnið er að kortlagningu mögulegs smits. Ákveðið var að skima 1-3. bekk skólans og allt starfsfólk og var sú sýnataka á heilsugæslunni á Reyðarfirði kl. 12. Aðrir nemendur skólans, forráðamenn eða ættingjar barna í skólanum sem hafa einkenni sem geta bent til Covid-19 eru einnig hvattir til þess að mæta í sýnatöku í dag. Hægt er að bóka sér sýnatöku á heilsuvera.is og mikilvægt er að mæta með strikamerki tilbúið þegar mætt er í sýnatökuna,“ segir í tilkynningu frá yfirlögregluþjóni á Austurlandi.
„Nú, sem aldrei fyrr, er mikilvægt að þeir sem sýna einkenni sem geta bent til Covid-19 (hiti, hósti, kvef, hálssærindi og fleira) haldi sig heima og bóki sér tíma í einkennasýnatöku. Reyðfirðingar, sem og aðrir, eru hvattir til að sinna vel persónubundnum sóttvörnum og notfæra sér það sem við höfum lært varðandi smitvarnir,“ segir einnig í tilkynningunni.
