Tveir í gæsluvarðhald fyrir fíkniefnasmygl með Norrænu
Tveir erlendir karlmenn voru í gær úrskurðaðir í tveggja vikna gæsluvarðhald fyrir að reyna að smygla miklu magni af sterkum fíkniefnum til landsins með Norrænu á fimmtudag.Samkvæmt frétt Mbl.is fundust 45 kíló af amfetamíni og kókaíni falin í bifreið mannanna við komuna til landsins. Talið er að um verðmætasta farm fíkniefna sem komið hefur til landsins sé að ræða.
Bifreið mannanna var skoðuð eftir að fíkniefnahundur lögreglunnar lét vita að hún væri áhugaverð.
Mennirnir voru báðir fluttir suður til Reykjavíkur í gærkvöldi með flugi. Í tilkynningu lögreglunnar á Austurlandi segir að rannsókn málsins sé á viðkvæmu stigi og ekki frekari upplýsingar veittar að svo stöddu.
