Töluverð aukning umferðarslysa austanlands
Alls tuttugu umferðarslys urðu á Austurlandi fyrstu sex mánuði þessa árs en það eru mun fleiri slys en orðið hafa á sama tímabili síðustu þrjú ár þegar þau voru tólf að meðaltali.
Af þessum tuttugu slysum sem hafa verið tilkynnt lögregla gerðust sex þeirra í liðnum júnímánuði og þurftu alls níu einstaklingar að leita læknisaðstoðar vegna þeirra slysa. Þá varð og eitt banaslys í umdæminu í júní þegar ferðamaður varð fyrir lyftara á Djúpavogi.
Flest slysin í júnímánuði tengdust bílveltum en fjögur slík atvik áttu sér stað. Tvær bifreiðar lentu harkalega saman á Fagradal þegar ökumaður annars bílsins missti stjórnina. Þar slösuðust þrír en meiðsl allra minni háttar sem þykir mildi. Rannsókn á því slysi stendur enn yfir af hálfu lögreglu. Eldri maður slasaðist eftir að hafa fallið af reiðhjóli á Egilsstöðum og ökumaður fjórhjóls meiddist einnig nokkuð þegar hann fékk hjólið yfir sig á malarslóða fyrir ofan Egilsstaði.
