Tjaldsvæðum fjölgað í Fjarðabyggð
Fjarðabyggð hefur ákveðið að fjölga tjaldsvæðum innan sveitarfélagsins í sumar sökum gríðarlegrar eftirspurnar eftir plássi.
Veðurblíðan á Austurlandi undanfarnar vikur hefur leitt til þess að örtröð hefur verið á tjaldsvæðum fjórðungsins.
„Straumurinn kom um leið og veðurblíðan skall á okkur og honum er ekkert að linna. Við erum fullbókuð fram yfir næstu helgi,“ sagði Elsa Reynisdóttir sem rekur tjaldsvæðið á Mjóanesi við Austurfrétt fyrr í vikunni en það hefur verið staðan á flestum tjaldsvæðum á Austurlandi.
Fjarðabyggð hefur stækkað tjaldsvæði í þremur bæjum:
Á Fáskrúðsfirði hefur verið bætt við svæði við smábátahöfnina, neðan við Café Sumarlínu.
Á Reyðarfirði hefur verið tekið í notkun svæði við hlið núverandi tjaldsvæðis.
Í Neskaupstað hefur verið opnað á svæði við Bakkaveg (ofan Sólbakka) þar sem tjaldsvæði hefur verið í tengslum við Eistnaflug.
Á þessum tjaldsvæðum er búið að koma upp salernisaðstöðu en ekkert rafmagn verður í boði.