Tilhæfulaus árás á unglingsstúlku
Ráðist var á unglingsstúlku á Reyðarfirði snemma á föstudagsmorgunn. Árásarmaðurinn náðist fljótt og játaði. Hann var undir miklum áhrifum fíkniefna.Þetta kemur fram í svari lögreglunnar á Austurlandi við fyrirspurn Austurfréttar.
Tilkynning um atvikið barst lögreglu rétt fyrir klukkan sex á föstudagsmorgunn. Árásin átti sér stað utandyra en stúlkan var á leið í líkamsrækt.
Henni var verulega brugðið og meidd í andliti. Hún fékk aðhlynningu læknis en fékk að fara heim að lokinni skoðun og meðferð.
Grunur beindist fljótt að einstaklingi búsettum á Reyðarfirði. Hann var handtekinn á heimili sínu og fluttur til yfirheyrslu þar sem hann játaði sök.
Árásin er rakin til neyslu fíkniefna og ofskynjana af þeirra völdum. Í svari lögreglu segir að árásin sé með öllu tilefnislaus og beint gegn einstaklingi sem gerandinn þekkti ekkert. Meint fíkniefni fundust heima hjá manninum við húsleit.
Málið er í rannsókn og er langt komið. Það verður sent ákærusviði að rannsókn lokinni til ákvörðunar um framhaldið.