Tíðafar austanlands nokkuð á pari í maímánuði
Hitastig á Austurlandi í liðnum mánuði reyndist vera í meðallagi samkvæmt tölum Veðurstofu Íslands um tíðafar á landinu.
Þó ýmsir hafi haft á orði að vorið og sumarbyrjun hafi verið óvenju gott veðurfarslega austanlands kemur annað í ljós þegar rýnt er í tölur Veðurstofunnar. Vorið var vissulega aðeins hlýrra en í meðalári á mælistöðum á Egilsstöðum, Dalatanga og Teigarhorni en í heild sinni var hitastig í maí aðeins lítilsháttar hlýrra en í meðalári.
Á Egilsstöðum mældist meðalhiti maí vera 5,7 stig eða 0,2 stigum hlýrra en meðaltal síðustu 30 ára. Meðalhiti á Dalatanga mældist 4,3 stig sem er 0,1 stig yfir meðatalinu. Á Teigarhorni var maímánuður 0,3 stigum hlýrri en að meðaltali síðustu árin en þar var meðalhitastigið 5,6 stig.
Samkvæmt sjálfsvirkum veðurstöðvum austanlands mældist mestur hiti mánaðarins á Seyðis- og Eskifirði en þar náði hitastigið upp í 17,9 stig á báðum stöðum.
Hitastig á Dalatanga nýliðinn maí reyndist ósköp samhliða mælingum síðustu 30 ára.