Þrjú smit á Reyðarfirði í viðbót
Þrjú ný Covid-smit greindust á Reyðarfirði við sýnatöku í gær. Allir hinna sýktu voru í sóttkví. Um 200 sýni voru tekin í bænum í dag.Flest sýnin í dag voru hjá einstaklingum á leið í sína seinni skimun. Senda þarf sýnin suður til Reykjavíkur til greiningar. Vegna veðurspár er óvíst að það takist í dag og því gæti tafist fram eftir morgundeginum að greina þau. Sóttkví gildir þar til niðurstaða liggur fyrir.
Skólarnir í bænum eru áfram lokaðir. Ákvörðun um skólahald verður ekki tekin fyrr en niðurstöðurnar liggja fyrir. Tilkynning verður send út þegar ákvörðun liggur fyrir.
Smitin á Reyðarfirði eru því alls orðin 19. Samkvæmt tölum á covid.is eru 206 í sóttkví á Austurland, flestir vegna þessa hópsmits.
Á morgun kl. 12:00 verða hraðpróf á Heilsugæslunni á Reyðarfirði fyrir þann hóp sem verið hefur í smitgát. Íbúar eru áfram hvattir til að fara í sýnatöku finni þeir til einhverra einkenna eða telja að þeir hafi verið í samskiptum við smitaðan einstakling.
Opnir tíma í hraðpróf og PCR próf sem hér segir:
Reyðarfjörður:
Hraðpróf 8:30-9:30
PCR 9:30-10:30 alla virka daga. Lokað um helgar.
Egilsstaðir:
Hraðpróf 11:30-12:30,
PCR 12:30-13:30 alla virka daga + Sunnudaga. Lokað á Laugardögum.