Þórður Vilberg nýr upplýsingafulltrúi Fjarðabyggðar
Reyðfirðingurinn Þórður Vilberg Guðmundsson hefur verið ráðinn í starf upplýsingafulltrúa Fjarðabyggðar og hóf hann störf 1. ágúst síðastliðinn.
Upplýsingafulltrúi starfar á stjórnsýslu- og þjónustusviði og var Þórður valinn úr hópi níu umsækjenda.
Meðal helstu verkefna upplýsingafulltrúa eru stefnumótun og umsjón með upplýsinga- og kynningarmálum sveitarfélagsins, þróunar- og verkefnavinna vegna samfélagsmiðla og rafrænnar stjórnsýslu, miðlun frétta og fjölmiðlasamskipti, vefumsjón, umsjón með gerð kynningarefnis auk skipulagning á viðburðum á vegum sveitarfélagsins.
Þórður er með menntun í sagnfræði. Hann hefur starfað sem þjónustufulltrúi hjá Strætó BS ásamt ýmsum öðrum þjónustustörfum. Hann hefur reynslu af upplýsinga- og kynningarmálum í störfum sínum fyrir framboð bæði til forseta- og sveitarstjórnarkosninga ásamt því að annast skipulag og stjórnað viðburðum þeim tengdum.
