Telur flygildi framtíðina í vöktun hafsvæða
Þingmaður Sjálfstæðisflokksins í Norðausturkjördæmi hvetur til þess að Ísland gerist sem fyrst aðili að Geimvísindastofnun Evrópu. Slíkt skipti máli fyrir vöktun á því gríðarstóra hafsvæði sem umlykur landið. Flygildi sem er í tilraunaflugi á Egilsstöðum sé það sem koma skal.Þetta kom fram í máli Njáls Trausta Friðbergssonar undir umræðum um störf Alþingis í síðustu viku en honum hafði þá hlotnast sá heiður að skoða flygildið, sem verður í prófunum á Egilsstaðaflugvelli fram á sumar.
Flygildið er hér á vegum Siglingaöryggisstofnunar Evrópu og er hér til að prófa það við erfiðar aðstæður.
Njáll Trausti benti á að vaxandi umferð væri á hafsvæðinu í kringum landið og beita þyrfti nýrri tækni til að vakta það.
„Mér segir svo hugur um að mannlausa flugvélin sem nú er á Egilsstaðaflugvelli sé forsmekkurinn að því sem koma skal á næstu árum. Hafsvæðið í kringum Ísland er gríðarstórt og slíkar vélar gætu nýst vel til eftirlits- og björgunarstarfa.
Að auki má nefna ýmis rannsókna- og vísindastörf sem tengjast Íslandi og hafsvæðinu í kringum landið. Reyndar er flugþol mannlausra flugvéla allt að tæpir tveir sólarhringar og þær gætu því farið býsna víða hér á norðurhvelinu í rannsóknarstörfum,“ sagði Njáll Trausti.
Hann hvatti ennfremur til þess að Íslendingar yrðu sem fyrst aðilar að Geimvísindastofnuninni og það verði tekið inn í vinnu við fjarskiptaáætlun sem stendur yfir og endurskoðun samgönguáætlunar í haust.
Mynd: Jens Einarsson