Sparisjóður Norðfjarðar til sölu: Dýrt kerfi eftir fall stóru sjóðanna
Sparisjóður Norðfjarðar er til sölu. Þetta var samþykkt með öllum
greiddum atkvæðum á stofnfjárhafafundi fyrir skemmstu. Stjórnarformaður
sjóðsins segir sparisjóðakerfið hafa orðið of dýrt eftir að stærstu
sparisjóðirnir drógu sig út úr samstarfinu.
Frá þessu er greint í nýjasta tölublaði Austurgluggans. „Sparisjóðirnir í landinu hafa átt með sér samstarf um ýmis málefni, til dæmis rekstur tölvukerfa, markaðsmál og vöruþróun. Eftir að stóru sparisjóðirnir eins t.d. og Sparisjóður Keflavíkur, Byr og SPRON, hafa horfið úr þessu samstarfi eiga þeir sjóðir sem eftir eru, sem flestir eru litlir sjóðir, erfitt með að standa undir þessum sameiginlega kostnaði,“ segir Jón Einar Marteinsson, stjórnarformaður sjóðsins.
Hann segir stjórn sjóðsins ekki hafa talið það skila nægilegri hagræðinu að sameina alla þá sparisjóði sem eftir eru í einn. „Við teljum að hagsmunum okkar sé best borgið með því að Sparisjóðurinn sameinist stærra fjármálafyrirtæki í samskonar rekstri. Þess vegna lögðum við fram þessa tillögu.“
Gert er ráð fyrir að söluferlið taki um tvo mánuði. Að því loknu verður boðað aftur til stofnfjárhafafundar þar sem stofnfjárhafar taka endanlega afstöðu til mögulegra tilboða.
