Sól í dag – stormur á morgun
Sólin leikur við Austfirðinga og spáð er allt að 20 stiga hita í dag. Fyrir morgundaginn hefur hins vegar verið gefin út stormviðvörun.Hæsti hiti sem mælst hefur á landinu í dag var 19,2 gráður á Seyðisfirði um klukkan átta í morgun. Hann lækkaði skarpt aftur. Klukkan ellefu var hins vegar kominn rúmlega 19 stiga hiti á Egilsstöðum.
Austfirðingar eiga von á góðu veðri fram yfir hádegi en um klukkan þrjú tekur að kólna og þegar nálgast kvöldmat má búast við umtalsverðri rigningu. Í verstu tilfellunum má búast við snjókomu til fjalla í nótt.
Undir hádegi á morgun léttir þegar vindur snýst til norðvesturs. Allhvasst gæti orðið, Veðurstofan hefur gefið út gula viðvörun fyrir Austfirði frá klukkan þrjú á morgun síðdegis til klukkan þrjú aðfaranætur miðvikudags.
Á þessum tíma er spáð 13-15 m/s meðalvindhraða og hviðum við fjöll upp á 15-25 m/s. Þær geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Á Austurlandi er reiknað með töluvert minni vindi.
Á miðvikudag og fimmtudag er síðan útlit fyrir ágætis veður.
