Smári Geirsson: Það voru gerð hróp að mér á götum Reykjavíkur

Smári Geirsson, fyrrum forseti bæjarstjórnar Fjarðabyggðar, segist hafa sætt líflátshótunum í aðdraganda byggingar álvers Alcoa Fjarðaáls í Reyðarfirði. Samstaða heimamanna er að hans mati forsendan fyrir að atvinnuverkefni á borð við álverið komist á laggirnar á landsbyggðinni.

„Það voru gerð hróp að manni á götum Reykjavíkur, maður fékk óþægileg símtöl og bréf sem fólu í sér grófar hótanir á borð við líflát. Umræðan fór út fyrir allt velsæmi,“ er haft eftir Smára í afmælisblaði Fjarðaálsfrétta.

Fimm ár eru um þessar mundir frá því álverið tók til starfa. Smári segir að tilkoma þess hafi orðið til þess að gefa Austfirðingum nýja trú á framtíð svæðisins. „Fólk fékk trú á því að hér væri hægt að skapa sér blómlega framtíð og margt ungt fólk snéri heim á ný að afloknu langskólanámi. Í þann hóp bættist síðan fólk sem átti rætur annars staðar en sá möguleika á góðri afkomu og bjartri framtíð eystra.“

Að mati Smára skiptir máli að heimamenn, einkum á landsbyggðinni, standi saman þegar þeir vilji koma á fót stórum atvinnulífsverkefnum.

„Við lærðum meðal annars hve mikilvægt það er að undirbúa samfélagið í heild sinni vel undir svona verkefni. Það á við hvort sem litið er til sveitarfélagsins, fyrirtækja á svæðinu eða stofnana. Menn verða að vera undir það búnir að standa í vægðarlausum deilum, sérstaklega sé verkefnið á landsbyggðinni.

 

Samstaða í heimahéraði verður að vera ótvíræð því það er forsenda þess að heimamenn geti haft áhrif á gang mála og verkefnið hér sýnir að það eru afgerandi aðgerðir á sviði atvinnulífs sem geta breytt hugarfari íbúa og snúið við óhagstæðri íbúaþróun.“