Smit hjá Loðnuvinnslunni og Tjarnarskógi
Covid-smit voru í gærkvöldi staðfest hjá Loðnuvinnslunni Fáskrúðsfirði og leikskólanum Tjarnarskógi á Egilsstöðum. Gripið hefur verið til aðgerða á báðum stöðum vegna þessa.Friðrik Mar Guðmundsson, framkvæmdastjóri Loðnuvinnslunnar, segir smitið hafa greinst hjá starfsmanni sem var að koma eftir ferð erlendis. Próf á landamærunum hafi reynst neikvætt en starfsmaðurinn hafi sóst eftir að taka hraðpróf þegar hann var kominn austur. Það hafi verið jákvætt og hann þá farið í PCR próf sem staðfesti niðurstöðuna.
Viðkomandi starfar í fiskimjölsverksmiðjunni. Fjórtán aðrir starfsmenn fyrirtækisins hafa farið í sóttkví eða smitgát vegna smitsins. Þeir sem eru í smitgát geta snúið aftur til vinnu á morgun. Friðrik segir að greinist ekki mikið fleiri smit verði áhrifin á starfsemina lítil.
Þá greindist einnig smit hjá leikskólabarni á Tjarnarskógi á Egilsstöðum í gærkvöldi. Helga Guðmundsdóttir, fræðslustjóri Múlaþings, segir að höfðu samráði við bakvaktarteymi hafi verið ákveðið að hafa deildina lokaða í dag. Beðið er fyrirmæla um framhaldið frá aðgerðastjórn almannavarnanefndar á Austurlands.
Hún kom saman til klukkan 14:30 í dag vegna smita sem greinst hafa á Austurlandi síðustu daga. Þeim hefur farið fjölgandi og voru í morgun 22 í einangrun í fjórðungnum. Tilkynningar um stöðuna er að vænta eftir fundinn.