Skólar í Fjarðabyggð með aðventustundir
Leik- og grunnskólar í Fjarðabyggð munu halda notalegar aðventustundir á skólatíma í desember þar sem boðið verður upp á ávexti og piparkökur.Þetta kemur fram á vefsíðu Fjarðabyggðar. Þar segir að vegna þeirra takmarkanna á samkomuhaldi sem í gildi eru um þessar mundir, vegna COVID, er ljóst að erfitt verður um vik að halda skemmtilega hefð sem skapast hefur á undanförnum árum. Hér er átt við þá hefð að tendra ljósin á jólatrjám Fjarðabyggðar við hátíðlega athöfn í hverjum byggðakjarna.
Bæjarráð Fjarðabyggðar samþykkti því á fundi sínum á dögunum þá tillögu upplýsinga- og kynningarfulltrúa að skólarnir héldu aðventustundir hver um sig. Skólarnir tóku vel í þessa tillögu og því mun hver skóli halda smá viðburð vegna þessa núna í desember. Fjarðabyggð mun eins og undanfarinn ár útvega ávexti og piparkökur og dreifa í allar skólastofnanir.
Einnig kemur fram að starfsmenn Fjarðabyggðar hafi unnið að því hörðum höndum að skreyta bæjarkjarnana að undanförnu. Settar hafa verið upp skreytingar á ljósastaura víða, og unnið var að því að setja upp ljósaskreytt jólatré.
