Sjómanni bjargað á Héraðsflóa
TF-Sýn, þyrla Landhelgisgæslunnar, bjargaði sjómanni eftir að eldur kom upp í báti hans á Héraðsflóa á þriðja tímanum í dag. Sjómaðurinn er við góða heilsu eftir atvikið.Stjórnstöð Landhelgisgæslunnar bárust neyðarboð frá sjómanninum á þriðja tímanum í dag en samkvæmt fyrstu boðum var báturinn sokkinn. Maðurinn, sem var einn um borð, komst í björgunarbát og og gat látið vita af sér.
Þyrlan var við leit á Melrakkasléttu en áhöfn hennar var þegar í stað beðin um að fljúga í austur. Rúmum hálftíma eftir að boðin bárust var búið að hífa manninn um borð í þyrluna.
Aðstæður til björgunar á flóanum voru góðar, að því fram kemur í tilkynningu Landhelgisgæslunnar. Eldur logaði enn í bátnum þegar þyrlan fór af slysstað. Hún lenti á Egilsstöðum um klukkan fjögur.
Mynd úr safni.
