Sjálfsagt að bændur á næstu bæjum nýti jarðirnar
Tveir danskir auðmenn, sem saman eiga fimm jarðir á Fljótsdalshéraði, hyggjast nýta eftirlaunaárin til að verja meiri tíma á Íslandi. Í samfloti við annan félaga eiga þeir hlut í sjöttu jörðinni í Breiðdal. Svisslendingurinn Rudolf Walter Lamprecth hefur nýverið keypt fjórar jarðir í Álftafirði.Þetta er meðal þess sem fram kemur í ítarlegri umfjöllun um jarðaeign á Íslandi í nýjasta tölublaði Stundarinnar. Umfjöllunin byggir meðal annars á gögnum frá Austurglugganum/Austurfrétt.
Austurglugginn varð í sumar fyrstur miðla til að greina frá eign og bakgrunni Dananna Mogens Nielsen og Birgir Brix á jörðunum Sleðbrjóti 1 og 2, Breiðumörk 1 og 2 í Jökulsárhlíð og Giljum á Jökuldal. Við úttekt Stundarinnar kom einnig í ljós eign á Hrúthömrum sem liggur við Gil. Alls eru þetta um 7000 hektarar.
Rætt er við bæði Mogens og Birger í blaðinu en þeir koma báðir úr stöndugum matvælafyrirtækjum í Danmörku. Dragsbæk, fyrirtæki Mogens, á í Kjarnavörum og Gæðabakstri og í gegnum þau tengsl hefur Mogens áratuga tengsl við Ísland.
Áhugamenn um veiðar og útiveru
Mogens segist mikill áhugamaður um hvers konar veiðar og hann líti á Ísland sem sitt annað heimili. Þeir félagar leggi mikið upp úr góðum samskiptum við nágranna sína, til dæmis sé sjálfsagt að bændur á næstu bæjum nýti jarðirnar til beitar og heyskapar. „Ég elska Ísland, fólkið og náttúruna og ég lít á Ísland sem mitt annað heimili.“
Birger segist hafa slegið til þegar Mogens hafði samband við hann. Hann lét af störfum sem forstjóri Palsgaard í sumar og ætlar sér að nota frítímann til að verja meiri tíma eystra. Hann hefur áhuga á veiðum og útiveru og segir fjölskylduna með í því.
Athygli hefur beinst að Dönunum eftir fréttir um jarðakaup Jim Ratcliffe og Jóhannesar Kristinssonar á Norðausturlandi, þar sem þeir eiga um 40 jarðir. Í grein stundarinnar er haft eftir Mogens, sem orðinn er 74 ára, að hann sé of gamall til að bæta við sig fleiri jörðum meðan Birger furðar sig á hvers vegna einn maður vilji eiga 40 jarðir. Þar kemur einnig fram að Gil sé til sölu.
Útgerðarkóngur í Breiðdal
Þeir eiga síðan hlut í Eyjum í Breiðdal en aðaleigandinn með 75% hlut er Vinterbörn Aps. Félagið tilheyrir dönsku Vinther Rasmussen fjölskyldunni. Stærsta eign hennar er Kangamiut sem seldur sjávarafurðir frá Grænlandi og víðar úr Norðursjó. Fyrirtækið er eitt hið stærsta á sínu sviði í Danmörku.
Höfuð fjölskyldunnar er Niels Vinther Rasmussen en Birger benti honum á að jörðin í Breiðdalnum væri til sölu. Þeir sitja saman í stjórn Kangamiut Holding, eina dótturfélags Vintherbörn. Fjölskyldan ræður fyrirtækinu ekki ein. Friðrik Mar Þorsteinsson, fisksali í Bretlandi, á 25% í fyrirtækinu og situr einnig í stjórninni.
Lamprecht í Álftafirði
Í úttekt Stundarinnar kemur einnig fram að Svisslendingurinn Rudolf Walter Lamprecht, sem til þessa hefur helst þekktur fyrir jarðaeign í Mýrdal, eigi jarðirnar Geithella 2, Kambssel, Múla 2 og 3 í Álftafirði í gegnum fyrirtækið Heiðarlax ehf. Jarðirnar eiga allar í Geithellnaá.
Tvö ár eru síðan Lamprecht, sem er Svisslendingur, lét af störfum sem framkvæmdastjóri og seldi eign sína í Regal Springs. Fyrirtækið stofnaði hann á miðjum níunda áratugnum til að efla veikar byggðir í Indónesíu og óx það upp í að verða eitt stærsta það stærsta í heiminum í eldi á beitarfiski (talapia) með um 8500 starfsmenn á heimsvísu.
