Síldarkvótinn tvöfaldast á milli ára
Ráðgjöf Hafrannsóknarstofnunnar fyrir næsta fiskveiðiár liggur fyrir. Jákvæðu fréttirnar eru að kvóti sumargotssíldar tvöfaldast milli ára, fer úr 35.500 tonnum og í rúm 72 þúsund tonn. Og ýsukvótinn hækkar um 11%, fer í 50 þúsund tonn..Þetta kom fram á fundi Hafnrannsóknarstofunnar í morgun. Þar segir að viðsnúningur virðist nú vera í þróun stofnstærðar íslensku sumargotssíldarinnar sem minnkaði ört frá árinu 2008 vegna slakrar nýliðunar og þrálátrar frumdýrasýkingar í stofninum.
Árgangur síldarinnar 2017 er metinn stór og kemur inn í viðmiðunarstofninn í ár. Ráðgjöf samkvæmt aflareglu stjórnvalda hækkar því úr 35.490 tonnum fyrir fiskveiðiárið 2020/2021 í 72.239 tonn fyrir 2021/2022 eða um 104%.
Neikvæðu fréttirnar eru að þorskkvótinn minnkar um 13%, fer úr 256.500 tonnum og niður í 222.700 tonn.
Fram kom á fundinum að árgangar þorsks 2013 (8 ára) og 2016 (5 ára) eru litlir og hafa þeir umtalsverð áhrif til lækkunar á stærð viðmiðunarstofnsins. Megin uppistaða í þyngd stofnsins er 4-9 ára þorskur og nú eru 2 af þeim 6 árgöngum slakir.
Stofnmatið í ár sýnir að stofnstærðin hefur verið ofmetin á undanförnum árum. Viðmiðunarstofn árið 2020 var þannig ofmetinn um 19% miðað við núverandi mat.