Rúm 9% Austfirðinga hafa fengið bólusetningu
Ríflega 9% Austfirðinga hafa annað hvort hafið bólusetningu við Covid-19 veirunni eða lokið henni að fullu. Ekkert er bólusett í þessari viku en um 300 skammtar eru væntanlegur austur í næstu viku.Samkvæmt tölum af boluefni.is hafa 4,1% íbúa Austurlands lokið bólusetningu og 5,1% hafið hana. Alls hafa því 9,2% fengið bóluefni. Er þetta hæsta hlutfallið sé tekið tillit til landshlutanna. Á landsvísu hafa 4,2% lokið bólusetningunni.
Frí er frá bólusetningum eystra þessa vikuna. Um 300 manns voru hins vegar bólusettir í síðustu vikum, samkvæmt upplýsingum frá Heilbrigðisstofnun Austurlands. Var þar annars vegar lokið við að bólusetja fólk í heimahjúkrun, sambýlum auk lögregluþjóna og sjúkraflutningafólks. Þá fengu íbúar yfir sjötugu á Seyðisfirði sinn fyrri skammt.
Á fjórðungsvísu er staðan sú að nánast er lokið við bólusetningu 80 ára og eldri, starfsfólk í heilbrigðisþjónustu og dagþjónustu er langt komið og nánast búið að bólusetja lögregluþjóna og sjúkraflutningafólk. Byrjað er að bólusetja slökkviliðsmenn.
Í næstu viku er von á 300 skömmtum af bóluefni, 100 frá Pfizer/BioNTech og 200 frá AstraZeneca. Síðarnefnda efnið er aðeins notað í 65 ára og eldri.
Á miðvikudag verða íbúar yfir sjötugu á Djúpavogi, Stöðvarfirði og Breiðdalsvík bólusettir auk þess sem slökkviliðsmenn, viðbragðsaðilar og sjálfstætt starfandi heilbrigðisstarfsfólk, svo sem tannlæknar og sjúkraþjálfarar, fá bólusetningar á Egilsstöðum.
Eftir tvær vikur er áformuð bólusetning á Vopnafirði en þegar líður nær páskum fá íbúar 70 ára og eldri annars staðar í Fjarðabyggð og á Fljótsdalshéraði boð í bólusetningu.
