Ríflega tuttugu í einangrun eystra
Meira en tuttugu einstaklingar eru í einangrun vegna Covid-19 veirunnar á Austurlandi samkvæmt nýjustu tölum af Covid.is. Nokkur fjölgun hefur orðið síðustu daga.Alls eru 22 skráðir í einangrun samkvæmt tölum frá í morgun af Covid.is og 56 í sóttkví.
Samkvæmt yfirlitskorti RÚV eru langflestir, 16 í einangrun á Egilsstöðum, tveir á Fáskrúðsfirði og svo einn á Stöðvarfirði, Breiðdalsvík og í Neskaupstað. Þar vantar upp á eitt tilfelli samanborið við skráningu Covid.is. Ekki er nýtt að skráningum um landfræðilega dreifingu smita beri ekki fyllilega saman.
Hjá aðgerðastjórn almannavarna á Austurlandi fengust þær upplýsingar að verið væri að safna nánari gögnum um ný smit frá rakningateymi, meðal annars hve margir hinna nýsmituðu hefðu verið í sóttkví við greiningu.
Vegna smitanna kemur aðgerðastjórnin saman klukkan 14:30 í dag. Tilkynningar er að vænta eftir þann fund.