Ráðherra: Vinnubúðir Alcoa henta ekki sem fangelsi
Ögmundur Jónasson, innanríkisráðherra, útilokar að vinnubúðum Alcoa
Fjarðaáls í Reyðarfirði verði breytt í fangelsi. Útlit er fyrir að þær
verði fjarlægðar á árinu.
„Það var gerð könnun á nýtingu vinnubúðanna sem fangelsis og sú könnun leiddi í ljós að það yrði óhagkvæmur kostur,“ er haft eftir Ögmundi í nýjasta tölublaði Austurgluggans.
Hann segir menn horfa á fangelsi á fangelsi í nágrenni við afkastamestu dómstólana á höfuðborgarsvæðinu. Það sé hagstæðast í rekstri. Verið sé að endurskoða lög um samfélagsþjónustu til að stytta biðlista eftir styttri afplánun.
Stöðuleyfi Alcoa fyrir búðunum gildir út árið 2011. Austurglugginn segir að ekki hafi verið sótt um framlengingu og því bendi allt til að búðirnar verði fjarlægðar á þessu ári.
