Opna fjöldahjálparmiðstöð á Skjöldólfsstöðum
Verið er að opna fjöldahjálparmiðstöð á Skjöldólfsstöðum á Jökuldal til að taka á móti fólki sem festist í bílum sínum á Möðrudalsöræfum í dag vegna óveðurs. Tjón hefur orðið víða á Austfjörðum í veðurofsanum.„Við erum að vinna í að koma fólkinu til byggða, bæði til norðurs og austurs,“ segir Kristján Ólafur Guðnason, yfirlögregluþjónn á Austurlandi.
Á sjötta tug fólks varð strandaglópar í bílum sínum á fjöllunum í dag. Það komst ekki áfram vegna veðurs og rúður voru farnar að brotna í bílunum. Fólkinu var komið í skjól í Möðrudal en þaðan stendur til að koma því áfram til byggða. Verið er að opna fjöldahjálparstöðvar, sú að austanverðu verður á Skjöldólfsstöðum.
Björgunarsveitir hafa verið á störfum um allt Austurland í dag og ljóst að tjónið er talsvert. „Það er talsvert tjón á Seyðisfirði, talsvert mikið á Reyðarfirði og eitthvert í Neskaupstað, Eskifirði og Fáskrúðsfirði,“ sagði Kristján Ólafur í samtali við Austurfrétt að loknum almannavarnafundi á sjötta tímanum.
„Á Reyðarfirði hefur orðið talsvert mikið tjón á meðal annars húsum og bílum. Þar hefur eitthvað dregið úr vindi en um tíma var ástandið erfitt,“ bætir hann við.
Kristján segir að veðurhamurinn hafi verið mestur á miðsvæðinu suður að Fáskrúðsfirði. Minna hefur verið um útköll þar sunnan við en á því svæði virðist veðrið heldur vera að versna.
Mesta hviða dagsins eysrtra samkvæmt mælum Vegagerðarinnar var í Hamarsfirði um hálf fimm í dag, 64 m/s. Þá mældist hviða við Sreiti upp á 53 m/s um hálf tvö og 48 m/s á Fagrdal skömmu fyrr. Víða hafa hviður farið yfir 40 metra.
Fólkinu var komið í skjól í Möðudal. Mynd úr safni.