Öll tæki komin af stað til að ryðja
Vegagerðin á Austurlandi hefur ræst út öll þau snjómoksturstæki sem hún hefur yfir að ráða til að moka vegi sem fylltust af snjó í bylnum síðustu tvo daga. Viðbúið er að Vatnsskarð og Fjarðarheiði opnist ekki fyrr en síðar í kvöld.„Við erum með öll tæki úti núna að reyna að opna það sem lokaðist. Þau eru bæði að vinna á láglendi og fjöllum,“ segir Jens Hilmarsson, yfirverkstjóri hjá Vegagerðinni í Fellabæ.
„Það var farið snemma af stað í morgun og við stefnum að því að vera með allt opið fyrir kvöldið,“ bætir hann við.
Stutt er í að Möðrudalsöræfi opnist þótt bílar séu fastir í Langadal sem taka þarf tillit til. Mokstursbíll er á leið upp á Vatnsskarð en viðbúið er að tíma takist að komast yfir, þar er mikill snjór.
Senda þarf snjóblásara upp á Fjarðarheiði þannig hún, líkt og Vatnsskarðið, opnast ekki fyrr en síðar í dag. Þar er líka yfirgefinn bíll. „Það er mikill snjór á heiðinni. Þar eru ákveðnir staðir sem eru snjóakistur og þær eru alveg pakkaðar, það hefur allt lamist niður. Við höfum fengið eitthvað af snjó síðustu daga. Þekktir skaflastaðir í til dæmis Hróarstungu eru troðfullir.“
Jens segir að þótt heiðin og skarðið opnist í dag verði leiðin vart meira en einbreið þannig hægt verði að komast í gegn. Viðbúið er að minnsta kosti á Fjarðarheiðinni taki næstu tvo daga að opna hana svo vel sé.
Á Fagradal varð umferðarslys í morgun og eru vegfarendur því beðnir um að fara með gát. Þokkalega hefur gengið að halda honum opnum síðustu daga.
Moksturstæki eru einnig á ferð á fjörðunum, svo sem út með Fáskrúðsfirði, í Berufirði þar sem er þæfingur, á leiðinni til Breiðdalsvíkur og milli Norðfjarðar og Reyðarfjarðar.
Þæfingur er merktur í kortum Vegagerðarinnar í Fannardal, í Eskifirði og Berufirði en þungfært í Tungu. Á þessum stöðum er mikill snjór og stendur til að moka betur. Annars er hálka eða snjóþekja þar sem ástandið er þekkt. Ófært er og lokað í Skriðdal.
