Nýr fóðurprammi kominn til landsins
Nýr fóðurprammi, sem tekur við hlutverki þess sem sökk í Reyðarfirði aðfaranótt 10. janúar, kom til landsins í fyrrinótt.Pramminn kom með flutningaskipi til Eskifjarðar um klukkan eitt í aðfaranótt mánudags. Jens Garðar Helgason, framkvæmdastjóri Laxa fiskeldis, segir að pramminn verði tengdur við eldisstöð fyrirtækisins að Gripalda í vikunni og þar með verði fóðrun þar komin í samt lag.
Flutningaskip kom sérstaka ferð með prammann frá Noregi en tók í leiðinni annan búnað sem fyrirtækið hafði pantað.
Pramminn sem sökk í óveðrinu sem gekk yfir Austfirði laugardaginn 9. janúar er enn á hafsbotni. Jens segir verið að fara yfir áætlanir um næstu skref. Byrjað verði á að ná um tíu þúsund lítrum af olíu úr honum, þótt enn hafi ekkert lekið út og síðan verði ákveðið hvernig prammanum sjálfum verði náð upp.
Fóðurpramminn hífður úr flutningaskipinu á Eskifirði. Mynd: Jens Garðar Helgason