Núningur við bryggjuna myndaði gat á bátnum
Talið er að gat sem kom eftir núning við bryggju hafi orðið til þess að eikarbáturinn Saga SU 606 sökk í höfninni á Breiðdalsvík aðfaranótt 11. febrúar síðastliðins.Þetta kemur fram í skýrslu Rannsóknarnefndar samgönguslysa um atvikið.
Sterkur vindur, sem fór upp í allt að 30 m/s í hviðum, stóð af hafi um nóttina svo til beint á bakborðshlið bátsins sem lá bundinn við flotbryggju.
Í skýrslunni kemur fram að sýnileg sé dæld í trébita á bryggjunni og skemmd, um metri að lengd, sé á samskeytum þilfars og lestar á stjórnborðshlið Sögu. Þar var fúi í efsta borðinu og telur nefndin að þar hafi orðið til gat þannig að sjór komst niður í lestina með þeim afleiðingum að báturinn sökk.
Báturinn var dæmdur ónýtur eftir að honum hafði verið lyft upp úr höfninni. Saga var gerð út til sjóstangveiða og smíðuð á Fáskrúðsfirði árið 1979.