Norskar herþotur væntanlegar til æfinga
Íbúar á Egilsstöðum og nágrenni geta átt von á að kyrrðin verði rofin hraustlega í vikunni þegar norskar orrustuþotur verða við æfingar á Egilsstaðaflugvelli.Sveit frá norska flughernum kemur til Keflavíkur í dag til að sinna loftrýmisgæslu Atlantshafsbandalagsins við Ísland. Ráðgert er að loftrýmisgæslunni ljúki um miðjan febrúar.
Sveitin er með fjórar F-35 orrustuþotur og 80 liðsmenn. Gert er ráð fyrir að sveitin æfi aðflug að flugvöllunum á Egilsstöðum og Akureyri á bilinu 16. – 24. janúar. Veður ræður endanlega hvenær æfingarnar verða.
Samkvæmt tilkynningu frá Landhelgisgæslunni er þetta í sjöunda sinn sem Norðmenn leggja Atlantshafsbandalaginu til flugsveit til að taka þátt í verkefninu á Íslandi en norski flugherinn var síðast hér á landi árið 2021.
Flugsveitin tekur þátt í verkefninu ásamt starfsmönnum í stjórnstöðvum Atlantshafsbandalagsins í Uedem, Þýskalandi (Combined Air Operations Center) og á öryggissvæðinu á Keflavíkurflugvelli, (NATO Control and Reporting Center-Keflavik).
Framkvæmd verkefnisins verður með sama fyrirkomulagi og áður og í samræmi við loftrýmisgæsluáætlun Atlantshafsbandalagsins fyrir Ísland. Flugsveitin kemur til með að hafa aðsetur á öryggissvæðinu á Keflavíkurflugvelli en þar dvelja einnig flugsveitir aðildarríkja Atlantshafsbandalagins við kafbátaeftirlit. Landhelgisgæsla Íslands annast framkvæmd verkefnisins í umboði utanríkisráðuneytisins og í samvinnu við Isavia.
