Norðfjarðará braut sér leið inn í ruslagryfju
Landeigandi á Norðfirði hefur fengið frest til að taka til eftir sig eftir að Norðfjarðará braut sér leið inn í ruslagryfju á landi hans þannig að rusl flæddi út í ána. Óheimilt er að urða úrgang annars staðar en á á viðurkenndum urðunarstöðum.„Svo virðist sem ábúandi hafi losað sig við rúlluplast og annað sem fellur til við búskapinn niðri við árbakkann.
Ástandið er ekki nógu gott. Landeigandinn hefur fengið frest fram í næstu viku til að taka til, annars verður farið í framkvæmdir á hans kostnað,“ segir Leifur Þorkelsson, starfandi framkvæmdastjóri Heilbrigðiseftirlits Austurlands.
Ekki var veitt leyfi fyrir að urða sorpið á þessum stað en óheimilt er að urða úrgang annars staðar en á viðurkenndum urðunarstöðum. Í vor gróf áin sig inn í bakkann og komst í gryfjuna með þeim afleiðingum að ruslið barst niður ána.
Veiðimenn hafa nokkrar áhyggjur af lífríki árinnar sem þykir ein besta sjóbleikjuveiðiá landsins. Sögur hafa gengið um að í ruslagryfjunni hafi verið fjöldi dýraskrokka en Leifur segir þær sögur orðum auknar, eftirlitið geti ekki staðfest nema eitt dýrahræ í gryfjunni. „Það er hins vegar aldrei gott að fá svona mengun út í ár.“