Norðfirðingar þurftu að skafa i morgun
Hryssingslegt hefur verið um að litast víða á Austurlandi í morgun og jafnvel þess dæmi að snjór hafi náð niður í byggð.Snjór var á lóðum Norðfirðinga þegar þeir fóru á fætur auk þess sem þeir þurftu að skafa af bílum sínum áður en þeir gátu ekið af stað.
Hiti var þar í kringum eina gráðu í nótt og gengur enn á með slyddu. Sólarhringsúrkoman er þar komin upp í 17 mm, sem er hið mesta á landinu.
Samkvæmt upplýsingum frá Vegagerðinni er skafrenningur og hálkublettir á Fjarðarheiði, þæfingur á Mjóafjarðarheiði, hálka á Vatnsskarði og hálka og hálkublettir á Vopnafjarðarheiði og Möðrudalsöræfum.
Útlit er fyrir áframhaldandi norðaustan átt með slyddu og strekkingsvindi fram eftir morgundeginum. Ekki er von fyrir að hagur Austfirðinga vænkist mikið fyrr en á sunnudag þegar vindur snýst til suðvesturs.
Mynd úr safni.
