Neistaflugstónleikunum aflýst
Í vor tilkynnti Neistaflugsnefndin að ekkert Neistaflug yrði í ár vegna þess óvissuástands sem ríkti í samfélaginu sökum heimsfaraldursins.
Þegar öllu var aflétt í lok júní síðastliðnum ákvað nefndin að halda Neistaflugstónleika á sunnudegi verslunarmannahelgar og var tilkynnt um þá fyrir um viku síðan. Þeim tónleikum hefur nú verið aflýst sökum þeirra samkomutakmarkanna sem ríkisstjórnin boðaði fyrir helgi.
„Upphafleg ákvörðun okkar í vor virðist hafa reynst rétt og við hefðum eflaust átt að halda okkur við hana. Okkur langaði að gera eitthvað þegar takmörkunum var aflétt en í ljósi nýjustu tíðinda fáum við ekkert um það ráðið. Við hlustum á sérfræðingana og aflýsum því Neistaflugstónleikunum í ár,“ segir nefndin í samtali við Austurfrétt.
