Múlaþing annast rekstur samkomurýmis á Seyðisfirði
Byggðaráð Múlaþings hefur samþykkt að sveitarfélagið annist rekstur samkomurýmis í fyrirhuguðum íbúðakjarna á Seyðisfirði fyrir eldri borgara. Því var hinsvegar hafnað að taka þátt í kostnaði við jarðvinnu vegna verkefnisins.Fjallað var um málið á fundi byggðaráðs í síðustu viku. Fyrir fundinum lá erindi frá Bæjartúni íbúðafélagi hses varðandi annars vegar hvort sveitarfélagið sé tilbúið að annast rekstur samkomurýmis í fyrirhuguðum íbúðakjarna á Seyðisfirði og hins vegar er óskað eftir viðræðum við sveitarfélagið varðandi mögulega aðkomu þess að kostnaði við jarðvinnu vegna verkefnisins.
Sveitarstjóri gerði grein fyrir fundi með fulltrúum félags eldri borgara á Seyðisfirði og samskiptum við fulltrúa Bæjartúns hses þar sem þessi mál voru m.a.rædd.
Eftirfarandi tillaga lögð fram og samþykkt samhljóða að því er segir í fundagerð:
„Byggðaráð Múlaþings samþykkir að sveitarfélagið annist rekstur samkomurýmis í fyrirhuguðum íbúðakjarna á Seyðisfirði í samstarfi við félag eldri borgara á Seyðisfirði og felur sveitarstjóra að ganga til samninga við Bæjartún íbúðafélag hses um leigu húsnæðisins.
Byggðaráð Múlaþings hafnar aðkomu sveitarfélagsins að kostnaði við jarðvegsframkvæmdir vegna fyrirhugaðs íbúðakjarna á Seyðisfirði og felur sveitarstjóra að koma þessari afstöðu á framfæri við framkvæmdaaðila“
