Mjóafirði úthlutað byggðakvóta á ný
Mjóifjörður hefur fengið 15 tonnum úthlutað af byggðakvóta en engum kvóta hefur verið úthlutað þangað síðustu tvö fiskveiðiár. Stöðvarfjörður fær mest austfirskra sjávarbyggða úr almennri úthlutun byggðakvóta.
Sjávarútvegs- og landbúnaðarráðuneytið úthlutaði í byrjun vikunnar almennum byggðakvóta, alls 5.374 þorskígildislestum, fyrir fiskveiðiárið 2019/20. Það er 797 lestum minna heldur á síðasta fiskveiði ári. Samdráttur á Austurlandi er 16 lestir, sem er í minna lagi þegar landshlutarnir eru bornir saman.
Á Austurlandi eru helstu tíðindin þau að byggðakvóta er úthlutað á ný til Mjóafjarðar eftir tveggja ára hlé. Úthlutunin er 15 tonn, sem er sami byggðakvóti og byggðarlagið fékk frá fiskveiðiárinu 2006/7 til 2016/17.
Mest hlutfallsleg aukning er á Vopnafirði en samdráttur á Borgarfirði. Mest af almennum kvóta, 109 tonn, fara á Stöðvarfjörð. Djúpivogur fær hins vegar mest, 300 tonn sem eru sérstök úthlutun frá Byggðastofnun.
Eftirtaldir staðir á Austurlandi fá úthlutað almennum byggðakvóta 2019/20 í þorskígildistonnum.
| Staður | Úthlutað 19/20 | Úthlutað 18/19 | Breyting milli ára % | Þar af sértækur kvóti |
|---|---|---|---|---|
| Vopnafjörður | 44 | 15 | 236,8% | 0 |
| Borgarfjörður | 26 | 41 | -27,2% | 0 |
| Mjóifjörður | 15 | 0 | - | 0 |
| Stöðvarfjörður | 109 | 124 | -15% | 0 |
| Breiðdalsvík | 75 | 90 | -15% | 0 |
| Djúpivogur | 300 | 300 | 0 | 300 |
