Minna á ábyrga ferðahegðun
Björgunarsveitir á 50 stöðum á landinu hafa í dag minnt ferðafólk á ábyrga ferðahegðun í tilefni af Safetravel-deginum. Austfirskar sveitir eru meðal þeirra.„Við heilsum upp á ferðafólkið, spyrjum hvert það sé að fara og ræðum við það um almenna ferðahegðun, til dæmis öruggan akstursmáta og stoppa ekki úti á miðjum vegi.
Ef fólkið er að fara inn á hálendið þá hvetjum við það til að skoða aðstæður vel, hafa góðan búnað og skrá ferðaplanið sitt, til dæmis á safetravel.is,“ segir Hrefna Ingólfsdóttir úr björgunarsveitinni Einingu á Breiðdalsvík.
Félagar úr sveitinni komu sér fyrir við Kaupfélagið um klukkan fjögur í dag. Hrefna segir umferðina ekki hafa verið mikla en gesti verið móttækilegir fyrir boðskapnum.
Dagurinn í dag markar einnig upphaf þrettánda sumarsins sem sveitir Landsbjargar sinna vakt á hálendinu. Vakt verður á þremur stöðum á hálendinu og taka félagar úr Sveinunga á Borgarfirði, Ísólfi á Seyðisfirði og Héraði þátt í ár.
Félagar í Einingu fara ekki í vaktina í ár. Hrefna segir sveitina í dag mest sinna aðstoð við aðrar sveitir í stærri útköllum eftir að samið var um að einkaaðili tæki að sér að sækja þá sem lentu í vanda á Öxi eða Breiðdalsheiði.
„Þegar ferðamönnunum fjölgaði sáum við út fyrir að þetta yrði þungur róður. Fjöldinn í dag er orðinn slíkur að sveitin hefði ekki staðið undir sér ef áfram hefði verið haldið á sömu braut. Í dag er því ekki mikið um útköll hjá sveitinni í dag.“
