Miðflokkurinn skoðar framboðsmál eftir þinglok
Ekki hefur enn verið ákveðið hvaða leið verður farin hjá Miðflokkinum við val á framboðslista fyrir þingkosningarnar í haust. Sigmundur Davíð Gunnlaugsson, formaður flokksins, hefur staðfest að hann gefi áfram kost á sér í Norðausturkjördæmi.„Ég verð í mínu kjördæmi, kjördæminu sem fann mig upp sem stjórnmálamann og tók mér svo vel og mér þykir svo vænt um,“ sagði Sigmundur Davíð í Kastljósi í gærkvöldi.
Aðspurður um hvenær yrði raðað á listann svaraði hann að það yrði væntanlega að loknu þingi.
Það sama sagði Hólmgeir Karlsson, formaður kjördæmisráðs flokksins í Norðausturkjördæmi, í samtali við Austurfrétt í morgun. Sem stæði væri lítið að frétta af framboðsmálum flokksins á svæðinu.
Samkvæmt lögum flokksins getur stjórn kjördæmafélags valið hvort skipuð sé uppstillinganefnd eða fimm efstu menn á lista kosnir á almennum félagsfundi.