Meirihluti í höfn á Vopnafirði
Betra Sigtún og Framsóknarflokkur og óháðir hafa gert með sér samkomulag um samstarf í meirihluta í sveitarstjórn Vopnafjarðarhrepps fyrir nýhafið kjörtímabil. Framboðin eru sammála um að byggja sundlaug í þéttbýlinu.Þetta kemur fram í yfirlýsingu frá framboðunum í dag.
Þau munu skipta oddvitaembættinu á milli sín, Sigríður Bragadóttir leiðtogi Framsóknarflokks gegnir því fyrstu tvö árin en Stefán Grímur Rafnsson, leiðtogi Betra Sigtúns, tekur við 2020.
Í tilkynningunni er tæpt á helstu atriðum úr málefnasamningi. Þar kemur meðal annars fram að framboðin séu sammála um að byggja sundlaug við íþróttahúsið, að undangenginni íbúakönnun.
Þá á að halda áfram byggingu vallarhúss og vinna viðhaldsáætlun fyrir eignir sveitarfélagsins.
Gert er ráð fyrir að hreppsráð, ígildi bæjarráða annars staðar sem vinnur mál milli funda hreppsnefndar, taki til starfa á kjörtímabilinu. Starf sveitarstjóra verður auglýst að loknum fyrsta fundi nýrrar sveitarstjórnar sem fyrirhugaður er föstudaginn 15. júní.
