Málin frá Norðfirði og Vopnafirði komin til saksóknara

Gæsluvarðhald rennur út í dag yfir karlmanni sem var fyrst um miðjan október handtekinn og úrskurðaður í gæsluvarðhald fyrir hrottalega árás á fyrrum sambýliskonu sína á Vopnafirði. Í greinargerð lögreglu, sem lögð var fram fyrir dómi, er árás heimfærð sem tilraun til manndráps.

Þær upplýsingar fengust hjá embætti Héraðssaksóknara að í dag verði farið fram á áframhaldandi fjögurra vikna gæsluvarðhald. Á þeim tíma verði tekin ákvörðun um útgáfu ákæru í málinu.

Í síðustu viku lauk rannsókn lögreglunnar á Austurlandi á andláti eldri hjóna í Neskaupstað í ágúst þegar málið var sent til Héraðssaksóknara til afgreiðslu og meðferðar. Karlmaður á fimmtugsaldri hefur sætt gæsluvarðhaldi og öryggisvistun síðar, vegna gruns um að hafa banað fólkinu. Núgildandi varðhald er til 20. desember og unnið er í málinu.

Lögreglan á Austurlandi rannsakar enn tildrög þess að eldur kom upp í húsnæði Austurljóss á Egilsstöðum um miðjan maí. Austurfrétt hefur fengið staðfest hjá lögreglu að þar sé grunur um íkveikju.

Hluti úr eftirlitsmyndavélakerfi í húsnæðinu var sendur til rannsóknar erlendis til að reyna bjarga úr honum gögnum sem varpað gætu ljósi á málavexti, en búnaðurinn skemmdist í eldinu. Enn er beðið eftir niðurstöðum þaðan.