Mælast til að fólk haldi sig heima
Lögreglan á Austurlandi mælist til að íbúar fjórðungsins haldi sig heima eins og kostur er meðan bylur gengur yfir svæðið. Nokkur umferðaróhöpp hafa orðið vegna veðursins í dag enda skyggni á vegum afar takmarkað.Árekstur varð á Fjarðarheiði undir klukkan þrjú í dag. Bíll sat fastur í skafli þegar annar kom og ók aftan á hann. Um svipað leyti fór bíll út af við afleggjarann til Vopnafjarðar á Möðrudalsöræfum.
Í hádeginu fór bíll út af Upphéraðsvegi við innkomuna í Egilsstaði. Ástæða óhappsins er rakin til snjós og hálku. Engin slys urðu á fólki í þessum óhöppum.
Þrátt fyrir þessi atvik segir lögregla að lítið hafi verið um óhöpp, meira um að bílar hafi setið fastir. Mjög blint er á vegum, bæði utan og innan þéttbýlis.
Almannavarnir á Austurlandi tóku á sjöunda tímanum þátt í fundi með Veðurstofunni og almannavörnum á landsvísu.
Í tilkynningu frá lögreglu, sem gefin var út eftir fundinum, eru ítrekuð tilmæli frá því fyrr í dag til íbúa um að vera ekki á ferðinni í kvöld og nótt að nauðsynjalausu. Helstu hálendisvegir, meðal annars Möðrudalsöræfi, Vatnsskarð, Vopnafjarðarheiði, Fjarðarheiði og Fagridalur eru lokaðir og færð á öðrum tekin að spillast. Skaplegra veðri er ekki spáð fyrr en annað kvöld þegar dregur úr snjókomu.