Lýsa yfir vonbrigðum með samgönguáætlun
Sveitarstjórn Djúpavogshrepps lýsir yfir vonbrigðum með samgönguáætlun sem nýverið var lögð fram á Alþingi. Ekki er gert ráð fyrir að Axarvegur komist til framkvæmda á næsta áratug samkvæmt henni.Sveitarstjórnin gerir bæði athugasemdir við áætlunina til næstu fimmtána ára en sérstaklega aðgerða áætlun til næstu fimm ára. Á henni er aðeins ætlaður einn milljarður í framkvæmdir á svæðinu frá Djúpavogi til Vopnafjarðar sem að mestu fer í Borgarfjarðarveg.
Sveitarstjórnin minnir á að undanfarin ár hafi verið einhugur á aðalfundi Samtaka sveitarfélaga á Austurlandi um að heilsársvegur um Öxi sé í forgangi nýframkvæmda í vegagerð á Austurlandi.
Hönnun vegarins sé lokið og beðið hafi verið í tíu ár eftir að framkvæmdir hæfust. Vegkaflinn sé 18 km langur og stytti leiðina milli Reykjavíkur og Egilsstaða um 71 km miðað við Hringveg með fjörðum.
Vakin er sérstök athygli á að Axarvegur sé eina verkefnið af þeim ellefu sem ákveðið var að ráðast í árið 2007 sem hluta af mótvægisaðgerðum vegna niðurskurðar aflaheimila. Óásættanlegt sé að þurfa að bíða í allt að aldarfjórðung til viðbótar en vegurinn er ekki á samgönguáætlun fyrr en á tímabilinu 2029-2033.
Sveitarstjórn Djúpavogshrepps skorar á þingmenn að breyta samgönguáætlun á þann veg að hún endurspegli vilja íbúa á Austurlandi og að tryggt verði fjármagn til að hefja framkvæmdir við Axarveg á næstu fjórum árum.