Litlar líkur taldar á að börn hafi smitast
Börn, sem fóru með skólabíl úr Eiða- og Hjaltastaðaþinghám í lok síðustu viku, eru komin í sóttkví eftir að bílstjóri þeirra greindist með Covid-19 smit. Litlar líkur eru taldar á að börnin hafi smitast af bílstjóranum.Skólahald í grunnskólunum í Fellabæ og á Egilsstöðum hefur verið fellt niður í dag meðan brugðist er við þeirri staðreynd að bílstjórinn var greindur með smit síðdegis í gær og verið er að fullklára smitrakningu.
Í tilkynningu frá Egilsstaðaskóla segir að bílstjórinn hafi síðast ekið með skólabörn á föstudag. Þau börn sem fóru með bílnum fimmtudag og föstudag í síðustu viku eru komin í sóttkví.
Þau verða í sóttkvínni fram á föstudag þegar sýni verður tekið úr þeim, en tíma tekur að fyrir veiruna að verða nógu öfluga þannig að hún mælist. Ef ekkert kemur í ljós í skimuninni verða börnin frjáls ferða sinna á ný. Rakningarteymi almannavarna mun hafa samband við foreldra barnanna með frekari upplýsingar og ráðgjöf.
Í tilkynningu skólans segir að litlar líkur séu taldar á að bílstjórinn hafi smitað nemendur þegar horft er til þeirra samskipta sem hann á við börnin þar sem þess hafi verið gætt við skólaakstur að fara eftir öllum sóttvarnareglum.
Þar kemur ennfremur fram að foreldrar fái frekari upplýsingar frá skólastjórnendum eigi síðar en á hádegi í dag.