Jódís hættir í sveitarstjórn
Jódís Skúladóttir, bæjarfulltrúi Vinstrihreyfingarinnar – græns framboðs í sveitarstjórn Múlaþings hefur beðist lausnar frá setu í sveitarstjórn og öðrum nefndum. Jódís var kjörin á Alþingi í kosningunum fyrir rúmum mánuði.Í stað Jódísar í bæjarstjórn kemur Borgfirðingurinn Helgi Hlynur Ásgrímsson. Hann tekur einnig sæti hennar sem áheyrnarfulltrúi í byggðaráði og heimastjórn Djúpavogs.
Kristín Sigurðardóttir verður aðalmaður í fjölskylduráði og Lára Vilbergsdóttir í byggingarnefnd menningarhúss. Heimastjórn Djúpavogs mun síðan skipa fulltrúa í stjórn Ríkharðshúss.
Jódís skipaði annað sætið á lista VG í Alþingiskosningunum þann 25. september síðastliðinn. Hún var kjörin á þing sem jöfnunarmaður í Norðausturkjördæmi. Nýliðar á þingi hafa fengið kynningu á störfum þingsins þótt ekki sé búið að staðfesta úrslitin að fullu vegna ágalla á vörslu atkvæða og talningu í Norðvesturkjördæmi.