Jafnréttið vart meira en hjá Múlaþingi
Nýverið fékk Múlaþing, annað árið í röð, sérstaka viðurkenningu Félags kvenna í atvinnulífinu (FKA) fyrir jafna stöðu kynjanna í stjórnunarstöðum í sveitarfélaginu. Múlaþing langt yfir 40/60 kynjaviðmiðinu sem FKA notar.
Verðlaununum Jafnvægisvogin er ætlað að auka veg kvenna í atvinnulífi og stjórnsýslu og jafna þannig hlut kvenna í stjórnunarstöðum hjá fyrirtækjum, stofnunum og sveitarfélögum. Viðmiðið er að lágmarki 40% konur á móti 60% körlum.
Múlaþing gerir gott betur en það samkvæmt upplýsingum Austurfréttar. Kynjahlutfallið er hnífjafnt sé litið til æðstu stjórnenda og meðal millistjórnenda eru konurnar í miklum meirihluta eða 64% á móti 36% körlum.
Hlutföllin voru konum enn meira í hag á síðasta ári hjá sveitarfélaginu en með tilkomu Slökkviliðs Múlaþings undir hatt sveitarfélagsins um áramótin jöfnuðust hlutföll æðstu stjórnenda.
Á myndinni heldur Björn Ingimarsson, sveitarstjóri, uppi viðurkenningu vegna þessa. Mynd Múlaþing
