Íþróttahúsið opnað fyrir gesti Eistnaflugs vegna hvassviðris
Skipuleggjendur rokkhátíðarinnar Eistnaflugs í Neskaupstað hvöttu gesti á hátíðartjaldsvæði á tíunda tímanum í kvöld til að flytja sig inn í íþróttahúsið vegna hvassviðris. Björgunarsveitin vaktar svæðið en engin tjöld hafa fokið enn sem komið er.Að sögn Daða Benediktssonar, formanns björgunarsveitarinnar Gerpis, byrjaði að hvessa seinni partinn í dag. Samkvæmt gögnum Veðurstofunnar mældist meðalvindur upp á 15 m/s og 28 m/s í hviðum um kvöldmat.
Vindurinn gekk síðan niður en virðist nú vera að aukast aftur. „Það gengur á með rokum og er hvasst. Þetta er ekkert brjálað en heldur ekki mjög tjaldvænt, ekki frekar en íslenskt rok er yfirleitt,“ segir Daði.
Gestir hátíðarinnar eru á tveimur tjaldsvæðum og kemur vindurinn harðar niður á sérstöku hátíðarsvæði úti á Bökkum. Þar eru um 30-40 tjöld og segir Daði aðeins þau öflugustu geta staðið af sér vindinn óstudd. Einhver tjöld eru í skjóli bakvið bifreiðar eða annað slíkt sem verndar þau.
Engin tjöld hafa fokið en nokkur lögðust undan vindinum og voru felld. Íþróttahúsið hefur verið opnað og í tilkynningu á Facebook-síðu hátíðarinnar eru „allir gestir á tjaldsvæði beðnir um að flytja sig í skjól.“
Daði segir hafa verið ákveðið að opna íþróttahúsið í tíma frekar meðan hátíðargestir væru ferskir heldur en þurfa mögulega að standa í aðgerðum í nótt þar sem spáð er hvassviðri fram eftir nóttu. „Vonandi fer vel um alla í nótt. Það verður örugglega gott partý í íþróttahúsinu!“ segir Daði að lokum.
Frá Eistnaflugi. Mynd úr safni.
