Íbúar verða enn í Breiðabliki þrátt fyrir myglu
Að undanförnu hefur verið unnið að endurbótum á húsnæði Breiðabliks, íbúðum aldraða í Neskaupstað, eftir að mygla fannst á mörgum stöðum í húsinu.
Áherslan í endurbótunum hefur verið að koma íbúðum hússins í lag en framkvæmdir munu standa yfir í langan tíma. Á meðan munum íbúar þurfa að búa við mygluna.
Forsaga málsins er sú að íbúar í Breiðabliki höfðum um langa hríð óskað eftir því að kannað yrði hvort mygla væri í húsnæði Breiðabliks og kom fram í frétt hjá Austurfrétt fyrr á þessu ári að Sveinn Árnason, einn íbúa Breiðabliks, sagði að íbúar hafi haft „áhyggjur af ástandinu sem setji bæði íbúa og starfsfólk í hættu.“ Starfsfólk fann einnig fyrir óþægindum sem talið var stafa af myglu og var föndursal Breiðabliks lokað vegna þess.
Fjarðabyggð ákvað að ráðast í heildarúttekt á húsnæðinu og réði verkfræðifyrirtækið EFLU til að sjá um sýnatöku. Sýnatakan fór fram í mars og apríl á þessu ári og í maí síðastliðnum var sveitarfélaginu birtar niðurstöður þeirrar rannsóknar.
Í ljós kom að húsnæðið var illa farið af myglu og hefur starfsfólki Breiðabliks verið tjáð að framkvæmdir geti tekið allt að þremur árum. Unnið hefur verið í því að gera þrjár íbúðir tilbúnar í sumar og búist er við því að íbúar þeirra flytji aftur inn í þær á næstu vikum.
Fleiri íbúðir verða teknar í gegn á næstunni og þá á m.a. eftir að ráðast í framkvæmdir á föndursal hússins sem enn er lokaður og þaki sem er illa farið. Engin ákvörðun hefur verið tekin um framkvæmdir á þakinu en möguleikarnir sem Fjarðabyggð stendur frammi fyrir er að skipta um allt timbur í því eða að skipt verði um timbur að hluta.
„Myglan í húsinu er auðvitað mikið áhyggjuefni og ástandið ekki gott. Fólk finnur mismikið fyrir henni, og hún fer t.d. illa í sumt starfsfólk,“ segir Ólafía Waldorff starfsmaður Breiðabliks.
