Hvatasjóður fyrir nemendur Háskólagrunns
Samkomulag var undirritað í gær um Gletting, nýjan hvatningarstyrk atvinnulífsins fyrir nemendur í Háskólagrunni Háskólans í Reykjavík á Austurlandi.Markmið styrksins er að hvetja nemendur til góðrar ástundar í Háskólagrunninum, sem verður í boði eystra frá og með næsta hausti. Þá er styrknum ætlað að auka vitund og umræðu um mikilvægi þekkingarstarfsemi í fjórðungnum, að því er fram kemur í tilkynningu.
Hver styrkur nemur 500.000 krónum og reiknað með að 1-2 nemendur geti hlotið hann í lok námsárs. Til þess þurfa þeir að hafa lokið náminu á einu ári með hæstu einkunn.
Alcoa-Fjarðaál, Síldarvinnslan, Loðnuvinnslan, Eskja og Laxar fjármagna styrkinn sameiginlega til tveggja ára, en fulltrúar þeirra hafa tekið virkan þátt í fjármögnun og stefnumótun háskólaverkefnisins á Austurlandi.
Fulltrúar fyrirtækjanna undirrituðu samninginn í gær ásamt framkvæmdastjóra Austurbrúar og rektorum Háskólans í Reykjavík og Háskólans á Akureyri. Vonir standa til að frá haustinu 2022 verði í boði háskólanám á vegum skólanna eystra í iðn og/eða tæknifræði.
Rektorar beggja skóla lýstu við undirskriftina yfir ánægju með aðkomu atvinnulífsins að verkefninu og sögðu hana til marks um víðtækan og mikilvægan samfélagslegan stuðning við uppbyggingu háskólanáms á svæðinu.
Háskólagrunnur HR á Austurlandi er fyrir þau sem vilja hefja háskólanám en vantar tilskilinn undirbúning. Hægt er að ljúka lokaprófi úr Háskólagrunni eða viðbótarnámi við stúdentspróf og nýta sem leið inn í nám á háskólastigi.
Umsóknarfrestur um námið rennur út 15. júní en kennsla hefst í ágúst. Námið verður sveigjanlegt, blanda af staðbundnu og stafrænu námi, með aðstöðu í Fróðleiksmolanum á Reyðarfirði.
Frá vinstri, Jóna Árný Þórðardóttir framkvæmdarstjóri Austurbrúar, Dagmar Ýr Stefánsdóttir yfirmaður samskipta og samfélagsmála hjá Alcoa Fjarðaáli, Sigurður Ólafsson verkefnastjóri hjá Síldarvinnslunni, Ari Kristinn Jónsson rektor Háskólans í Reykjavík og Eyjólfur Guðmundsson rektor Háskólans á Akureyri. Mynd: Austurbrú