HM í fótbolta hægði á ferðamönnum
Stærstu leikir heimsmeistarakeppninnar í knattspyrnu í sumar höfðu
merkjanleg áhrif á ferðamannastraum um Austurland. Straumurinn virðist
nokkuð stöðugur fram í miðjan september.
Þetta eru niðurstöður úr ferðateljara sem settur var upp við gönguleið að Hengifossi í Fljótsdal í sumar og taldi frá 3. júlí til 25. september.
Um 16.700 manns lögðu leið sína upp að fossinum þessa daga eða tæplega 200 einstaklingar á dag. „Sjáanleg áhrif voru þá daga sem úrslitaleikir HM stóðu yfir og einnig þegar Norræna er á Seyðisfirði,“ segir í bókun sveitarstjórnar Fljótsdalshrepps um niðurstöðurnar.
„Ekki dró verulega úr fjölda fyrr en í lok ágúst og í september hrapar meðaltal ekki niður fyrr en seinnipart mánaðarins.“
Austfirskir ferðaþjónustuaðilar töluðu margir um það seinasta sumar að heimsmeistarakeppnin og eldgosið í Eyjafjallajökli hefðu dregið úr ferðamannastraumi á svæðið.
