Helmingi fleiri farartæki í fyrstu ferð Norrænu

Helmingi fleiri farartæki komu í fyrstu ferð Norrænu þetta árið heldur en í fyrra. Ferjan kom fyrr en áætlað var til að forðast óveður. Ekki hafa enn borist tíðindi af tjóni eða óhöppum í umdæmi lögreglunnar á Austurlandi.

Norræna kom seinni part mánudags til Seyðisfjarðar vegna veðurspár en hún kemur vanalega á þriðjudagsmorgnum. Ferjan fer hins vegar á venjubundnum tíma klukkan 22:00 í kvöld.

Að þessu sinni komu 32 ökutæki með ferjunni, samanborið við 16 í fyrstu ferðinni í fyrra. Farþegar voru 68 talsins. Ökutækjunum þurfti að koma í land en farþegar fengu að gista um borð í ferjunni frekar en leggja af stað í hvassvirði og hálku á Fjarðarheiði.

Samkvæmt upplýsingum frá lögreglunni á Austurlandi gekk vel að tollafgreiða ferjuna en eftirlit hefur verið hert, meðal annars eftir nokkur stór fíkniefnamál sem upp komu í tengslum við ferjuna, í fyrra. Þá tóku um áramótin gildi ný lög sem leggja auknar skyldur á herðar þeirra sem flytja ökutæki til landsins.

Vikan hefur annars verið róleg hjá lögreglunni á Austurlandi og ekki hafa borist tilkynningar um umferðaróhöpp í hálku á vegum í gær né í morgun, þrátt fyrir fréttir þar um.

Ekki hefur heldur verið tilkynnt um foktjón í hvassviðrinu sem nú gengur yfir fjórðunginn. Austfirðingar virðast almennt vel undir búnir enda stormurinn einungis sá síðasti í röðinni undanfarinn mánuð.

Veðurstofan gaf í gær út gula viðvörun vegna stormsins sem gildir til klukkan 17:00 í dag á Austfjörðum. Spár gera þó ekki ráð fyrir að vindinn lægi að ráði fyrr en seint í kvöld.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.