Harður árekstur eftir að bíll fór á öfugan vegarhelming

Mildi þykir að engin slys hafi orðið á fólki í hörðum árekstri skammt sunnan við Djúpavog seinni part laugardag. Báðir bílarnir eru gjörónýtir. Annar bíllinn fór á öfugan vegarhelming og virðist ökumaður hans ekki hafa verið með hugann við aksturinn.

Bílarnir tveir skullu saman rétt eftir klukkan fjögur á laugardag ofan við Stekkjarhjáleigu. Aðstæður þar voru hinar bestu, logn, sól, hiti, þurr og beinn vegur, ekkert í umhverfinu sem hindraði sýn að ráði. Bílarnir voru báðir nýlegir.

Í báðum bílunum voru erlendir ferðamenn. Tildrög slyssins eru ekki að fullu staðfest en ljóst er að annar bíllinn fór yfir á öfugan vegarhelming og lenti framan á hinum af miklum krafti. Áreksturinn var harður og fóru bílarnir báðir út fyrir veginn en hvorugur valt.

Grétar Helgi Geirsson, lögreglumaður frá Fáskrúðsfirði sem var sendur á vettvang, telur það hafa skipt miklu máli. „Meðan bílarnir velta ekki þá virkar öryggisbúnaðurinn í þessum nýju bílum, loftpúðar og beltastrekkjarar,“ segir hann.

Svo virðist sem ökumaður bílsins sem fór á rangan vegarhelming hafi ekki verið með hugann við aksturinn. Mjög alvarleg slys hafa orðið í íslenskri umferð að undanförnu þar sem erlendir ferðamenn fara á rangan vegarhelming.

„Í þessu tilfelli virðist ökumaðurinn hafa verið að fylgjast með einhverju öðru, hvort sem það var eitthvað í umhverfinu eða annað. Það er margt sem glepur í framandi umhverfi.“

Erfitt er fyrir íslensk samgönguyfirvöld að ná til erlendra ferðamanna með áróðri en hægt er að minna heimamenn að vera ávallt á varðbergi, bílar sem koma á móti geta farið á öfugan vegarhelming eða stoppað mjög skyndilega.

En það er síður en svo að skortur á athygli í umferðinni sé eingöngu bundinn við erlenda ferðamenn. „Íslendingarnir eru líka hættulegir. Við sjáum meira af því að ökumenn sem við mætum eru að horfa niður á símann.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.