Hæpið að VA þurfi að vísa nemendum frá
Skólameistari Verkmenntaskóla Austurlands segir hæpið að þeir nemendur sem sækja um skólavist við skólann næsta vetur komist ekki að. Sömu sögu er hins vegar ekki að segja af öðrum iðnnámsskólum.RÚV greindi frá því í morgun að bæði í fyrra og nú hafi Tækniskólinn þurft að hafna nemendum vegna skorts á kennurum, húsnæði og fé. Fleiri fjölbrautarskólar séu í svipaðri stöðu.
Hafliði Hinriksson, skólameistari VA, segir að eins og staðan sé nú eigi allir sem sæki um skólavist þar næsta vetur að fá inni. Aðsóknin sé þokkaleg í verknámið en enn séu laus pláss.
Ekki sé sjáanleg nein sprenging í heildaraðsókn en alltaf séu sveiflur milli ára.