Hægir á hreyfingunni við Búðará
Heldur hefur hægt á hreyfingu jarðvegsfleka ofan við Búðarárfoss á Seyðisfirði síðan í gær.Þetta kemur fram í tilkynningu frá Veðurstofu Íslands.
Mælingar í gær sýndu að hert hafði á hreyfingunni eftir rigningar síðustu daga. Éljagangur var á Seyðisfiðri í gærkvöldi og nótt og samkvæmt mælingum í morgun hefur hægst á hreyfingunni.
Vatnsborð hækkaði í borholum í gær en er tekið að lækka í flestum aftur sem er vísbending um minnkandi vatnsþrýsting. Áfram verður fylgst með aðstæðum næstu daga. Veðurspár gera ráð fyrir að úrkoma sem falli fram að helgi verði í formi snjós eða slyddu.
