Glæpatíðnin er lægst á Austurlandi
Fjöldi hegningarlagabrot á landinu er hlutfallslega lægstur á Austurlandi. Þetta kemur fram í yfirliti frá Ríkislögreglustjóra um fjölda skráðra afbrota á landsvísu hjá lögreglunni fyrir árið 2020.Í yfirlitinu kemur m.a. fram að á Austurlandi voru framan 102 afbrot á hverja 10.000 íbúa. Er hlutfallið á svipuðum slóðum og það hefur verið frá árinu 2018. Næst á eftir Austurlandi koma Vesturland með 116 afbrot og síðan Norðurland vestra með 131 afbrot.
Þetta hlutfall var langhæst á höfuðborgarsvæðinu eða 424 afbrot sem er svipað og í fyrra. Fram kemur að um 80% af öllum afbrotum á landinu eru skráð í höfuðborginni en næst á eftir koma Suðurnes með 6% af heildinni.
Mest hlutfallsleg fækkun brota milli ára á hvern íbúa var í Vestmannaeyjum (-24,9%), en þar var almennt fækkun í flestum undirflokkum og á Vesturlandi (-21,6%) en þar var mest fækkun á auðgunarbrotum.
Hlutfallslega var mest aukning hegningarlagabrota á hvern íbúa á Norðurlandi vestra (75,8%) en þar er einnig mest aukning á auðgunarbrotum.
Tekið er fram að þess beri að geta að þar sem íbúar eru fáir, þarf tiltölulega fá brot til þess að hækka tölur yfir brot pr. íbúa frekar mikið.