Fundað á Öxi: Snjómokstur ekki á ábyrgð eins sveitarfélags - Myndir

Höfundur: Gunnar Gunnarsson • Skrifað: 03. febrúar 2011.

Bæjarráð Fljótsdalshéraðs og sveitarstjórn Djúpavogshrepps eru sammála um að Djúpavogshreppur eigi ekki eitt sveitarfélaga að bera kostnað af snjómokstri á veginum yfir Öxi. Ályktun þess efnis var samþykkt á sameiginlegum fundi á Merkjahrygg á Öxi seinasta föstudag.

Ályktunin er svohljóðandi:

„Bæjarráð Fljótsdalshéraðs og sveitarstjórn Djúpavogshrepps fagna aukinni áherslu Vegagerðarinnar á þjónustu vegna Axarvegar og þeim samgöngubótum sem því fylgir fyrir fjórðunginn. Djúpavogur og Fljótsdalshérað tilheyra sama þjónustusvæði hvað varðar félagsþjónustu, málefni fatlaðra og brunavarnir.

Greiðar samgöngur um Axarveg eru því mikilvægar og til hagsbóta fyrir allt Austurland  og styttir akstursleiðina frá Reykjavík til Héraðs um 71 kílómetra með tilheyrandi sparnaði á ört hækkandi eldsneyti.

Af þessum sökum fæst ekki séð að sá snjómokstur geti verið á ábyrgð eins sveitarfélags öðrum fremur , hvað þá að ákvörðun þar um geti legið hjá Djúpavogshreppi. Bæjarráð Fljótsdalshéraðs og sveitarstjórn Djúpavogshrepps telja því  á engan hátt ásættanlegt að Djúpavogshreppi sé ætlað að standa straum af helmingi kostnaðar vegna snjómoksturs á Öxi samkvæmt breytingu sem nýlega var gerð á G-reglu.

Bæjarráð Fljótsdalshéraðs og sveitarstjórn Djúpavogshrepps beina því þeim tilmælum til ráðherra að hann hlutist til um að horfið verði frá kröfu um helmingagreiðslu  frá Djúpavogshreppi vegna snjómoksturs á Öxi eftir 5. janúar eins og gert er ráð fyrir í nýlegri breytingu á G-reglu Vegagerðarinnar.“

Myndir: Djúpavogshreppur, Andrés Skúlason.