Framleiðsla á laxi þrefaldast á skömmum tíma
Framleiðsla á laxi á Austurlandi nærri þrefaldaðist milli áranna 2018 og 2019. Nýjar tölur sýna hraðan vöxt í fiskeldi á svæðinu.Árið 2018 var framleiðslan eystra 3.741 tonn en 9.674 tonn ári síðar. Í fyrra var hún 10.241 tonn.
Þetta kemur fram í mælaborði fiskeldisins, upplýsingaveitu sem opnuð var á vef Matvælastofnunar í gær.
Þar er hægt að fara yfir þróun fiskeldis á Austfjörðum tæp 20 ár aftur í tímann. Á árunum 2004-6 voru framleidd um 4000 tonn af laxi á ári að meðaltali en tæp 600 tonn af þorski þegar mest lét.
Ekki löngu síðar var laxeldinu hætt og á árunum 2008-13 er aðeins skráð þorskeldi á svæðinu. Það var komið niður fyrir 100 tonn 2013 og lognaðist út af 2015. Þá var komið af stað eldi á regnbogasilungi sem varð mest um 2.000 tonn árið 2017. Síðan hefur laxinn alfarið tekið við.
Í mælaborðinu má greina tölur um fiskeldi eftir svæðum og tegundum á myndrænan hátt. Þar er einnig hægt að sjá upplýsingar um lífmassa í sjó, afföll og laxalús en þær upplýsingar ná enn sem komið er aðeins nokkra mánuði aftur í tímann.